Sekretari i Burimeve Njerëzore në FRPD, Indrit Hoxha, kallëzon penalisht Policinë e Shtetit për dëshmi të rreme gjatë gjyqit në ngarkim të tij për protestën e 2015-ës te bunkeri pranë Ministrisë së Brendshme.
Protesta në fjalë u zhvillua më 17 shtator 2015, ndërsa gjyqi nisi më 10 shkurt 2016.
Gjykata e Shkallës së Parë e dënoi me 200,000 lekë gjobë, ndërsa pritet që çështja në fjalë të kalojë në Gjykatën e Apelit.
Sipas Hoxhës, policia ka dhënë dëshmi të rreme para gjykatës pasi siç shihet edhe në videon që është shpërndarë edhe në rrjetet sociale, janë uniformat blu që përdorin dhunë dhe jo ai.
“Këtë javë dorëzoj kallëzimin penal për policinë e shtetit për deshmi të rreme në gjyqin tim ndaj simbolit të diktaturës “BUNKERIT”. Ja dhe video që vërteton se ishin policët që sulmuan dhe une nuk bëra asnjë rezistencë e le më të kundërshtoja, dhunoja, apo për më tepër të plagosja me mjete të mprehta”, thotë Hoxha, sipas të cilit videoja e mëposhtme nuk u pranua si provë në Gjykatën e Shkallës së Parë.
Sekretari i Burimeve Njerëzore në FRPD shprehet edhe një herë se, ky bunker është një ndërtim pa leje dhe nuk duhet të jetë aty ku qëndron edhe sot si “bunker-muze”. (A.R/SHUPLAKA)
