Kanë përfunduar në burg banditët shqiptarë që ishin bërë tmerri i banorëve në trekëndëshin Lucca-Pistoia-Firenze, duke kryer grabitje e vjedhje në makina e shtëpi.
Pesë prej tyre ishin autorë të një akti barbar në 14 maj të vitit të kaluar, kur në një vilë në Camigliano një grua 86-vjeçare, Isola Mannoni, u lidh e u la e shtrirë përtokë teksa autorët i plaçkitnin shtëpinë.
Autorët tani janë në qeli. Emrat e tyre janë Flori Sejdini, Ervis Marashi e Kristian Kulli, të gjithë 25 vjeçarë, Zef Paluca, 40 vjeç, si dhe rumuni Vasile Viprian Deesy, 41-vjeçar, shkruajnë mediat italiane.
86-vjeçarja gjeti forca të bashkëpunonte me karabinierët, duke iu ofruar të dhëna për agresorët. Arrestimi i tyre është bërë dje, në disa lokalitete të provincave të Luccas e Pistoias.
Në operacionin “Tramonto” për arrestimin e tyre janë angazhuar rreth 35 forca, nën komandën e togerit Rosario Tedesco.
Prokuroria po punon për të provuar edhe shumë krime të tjera të kryera nga grupi i shqiptarëve dhe personave të tjerë që mund të jenë përfshirë, por ndërkohë objektivi i parë i është arritur, duke zbardhur gjithë ngjarjen në grabitjen e të moshuarës. (A.R/SHUPLAKA)
Discussion about this post