Një drejtues automjeti përfundoi në prangat e policisë për mitdhënie. Blutë arrestuan shtetasin me iniciale G.T, 22 vjeç, banues në Laç, pasi ky i fundit i ka ofruar ryshfet punonjësit të policisë rrugore për të shmangur pezullimin e lejes së drejtimit për shkeljen e bërë.
“Ky shtetas në aksin rrugor Laç-Lezhë, gjatë operacionit të zhvilluar nga policia rrugore me objekt ndëshkimin e kundërvajtësve që ecin me shpejtësi, është konstatuar duke lëvizur me mjetin e tij me shpejtësi tej normave të lejuara. Në momentin e ndalimit dhe ndëshkimit administrativ me pezullim leje drejtimi , i ka ofruar 50 Euro punonjësit të policisë të qarkullimit rrugor për të shmangur pezullimin e lejes së drejtimit”, thuhet në njoftimin e Policisë.
Në cilësinë e provës materiale u sekuestruan Eurot edhe automjeti.
Materialet proçeduriale iu referuan Prokurorisë së Rrethit Gjyqësor Lezhë për veprën penale “Korrupsion aktiv ndaj personave që ushtrojnë funksione publike”. (A.R/SHUPLAKA)
Discussion about this post