Skandal në maternitetin “Koço Gliozheni”, 250 milionë lekë investim por “Bebe në provëz” nuk funksionon

Materniteti “Koço Gliozheni” përfshihet në një tjetër skandal, këtë radhë  për fekondimin “In Vitro”, i cili quhet ndryshe edhe “Bebe në provëz”.

Rreth tre vjet më parë, materniteti njoftoi se kishte përfunduar repartin “In Vitro”, i cili do t’u jepte një shans për t’u bërë me fëmijë çifteve që kishin probleme dhe nuk kishin mundësi financiare për të udhëtuar jashtë vendit për t’iu nënshtruar procedurës në fjalë.

Por sipas emisionit investigativ “Fiks Fare”, kjo procedurë që ka hyrë në Shqipëri që në vitin 2002, ende bëhet vetëm në spitalet dhe klinikat private.

Pavarësisht së në vitin 2012, një organizatë ndërkombëtare e quajtur IPA, ka investuar plot 250 milionë lekë të vjetra për pajisjet e këtij reparti në maternitetin “Koço Glozheni”, mësohet se ato nuk janë vënë asnjëherë në punë.

Mjeku gjinekolog Orion Gliozheni, shpjegon se ky repart është ndërtuar dhe pajisur në bashkëpunim me Ministrinë e Shëndetësisë dhe një Organizatë Ndërkombëtare. Sipas tij, specialistët nuk mungojnë, pavarësisht se ky repart aq I rëndësishëm ende nuk është vënë në punë.

 “Është gjynah që ky repart nuk funksionon”, thotë gjinekologu.

Ndërkohë, gazetarët e Fiksit kanë kontaktuar edhe me drejtorin e ri të spitalit, Arben Rrugia, i cili premton se do t’I japë përparësi kësaj çështjeje.

“Jam informuar për këtë investim dhe e ka bërë pajisjen e repartit një organizatë ndërkombëtare që quhet IPA, është një shërbim shumë i rëndësishëm dhe unë do bëj maksimumin ta vë në punë”, shprehet drejtori i spitalit. (D.D/Shuplaka)