2400 vende të lira pune në shtet dhe privat. Si mund të bëhet aplikimi online

Shërbimi Kombëtar i Punësimit ka publikuar në faqen zyrtare online 2.401 vende të lira pune të shpërndara në të gjitha qytetet e vendit, ku përmes regjistrimit online kandidatët mund të aplikojnë për vendin e punës që dëshirojnë.

Për këto vende të lira pune mund të aplikojë çdokush që plotëson kriteret e kërkuara nga punë-dhënësi përkatës. “GSH” publikon të plotë listën me vendet e lira të punës, kompanitë që kërkojnë punonjës, qytetet në të cilat ato ofrohen si dhe afatin përfundimtar kur mund të aplikohet për përfitimin e tyre.

Aplikimi për to mund të bëhet online, pasi faqja zyrtare e Shërbimit Kombëtar të Punësimit (puna.gov.al) iu jep mundësi të interesuarve të aplikojnë direkt për vendin ku dëshirojnë të punësohen. Për të kryer këtë procedurë duhet të jeni të regjistruar në sistem, pasi në rastin kur ende nuk keni krijuar llogarinë personale, keni të drejtë të vizitoni të gjitha ofertat e punës, por nuk iu jepet mundësia e aplikimit për një vend pune.

Këtë të drejtë e merrni pasi keni krijuar profilin e punëkërkuesit, i cili përmban të dhëna bazë si: Emri, mbiemri, ditëlindja, numri i kartës së identitetit, gjinia apo adresa e email-it. Pas regjistrimit të këtyre të dhënave, sistemi dërgon automatikisht fjalëkalimin në adresën e postës elektronike, i cili të mundëson aksesueshmërinë në faqe si dhe aplikimin për vendet e lira të punës.

Sa u takon vendeve të publikuara, ka një larmishmëri profesionesh dhe zanatesh, duke filluar nga punëtor krahu, roje, shitës, rroba-qepës, operator kompjuteri, sekretare, kuzhinier, picajol, saldator, agjent shitjeje pasurie të patundshme, deri tek ekonomist, inxhinier pyjesh, agronom, inxhinier kimist, gjeolog, disenjator, edukatore kopshti, infermier, laborant në mjekësi etj.

Në faqen zyrtare të Shërbimit Kombëtar të Punësimit, veç këtyre 2.401 vendeve të lira të punës të regjistruara online, sqarohet se janë të regjistruara në total gati 38 mijë vende të lira pune. Të interesuarit duhet të drejtohen pranë Shërbimit Kombëtar të Punësimit. (E.K/SHUPLAKA)