Personi që ka gjetur kokën e një njeriu ende të paidentifikuar, ka dhënë detaje lidhur ngjarjen makabre të raportuar mëngjesin e sotëm në fshatin Roms të Vlorës.
Në një lidhje telefonike, bariu i zonës zbuloi për një televizion se ishte duke kaluar rastësisht kur vuri re kokën e njeriut sipër dheut në atë zonë. Ai shprehet se menjëherë njoftoi policinë dhe nuk e preku aspak me dorë.
Ai ka treguar se zona ku gjeti kafkën, përdoret kryesisht për kullota dhe nuk është e banueshme.
“Po kaloja në Karabunarë kur pashë sipër dheut një kokë njeriu. Nuk di gjë se kush mund të jetë, pasi sapo pashë kokën njoftova policinë dhe nuk e preka me dorë.”, është shprehur ai.
Nga hetimet e deritanishme, dyshohet se koka i përket një personi të vrarë para tre muajsh, që është dërguar për ekzaminime mjekoligjore.
Nga këqyrja paraprake, është bërë e ditur se në kafkë kishte një vrimë që mund të jetë shkaktuar nga një armë zjarri. Dyshohet edhe se viktima është një person i zhdukur rreth 3 muaj më parë. (XH.A/SHUPLAKA)
