Ditën e djeshme në një takim të përbashkët mes disa autoriteteve në vend u bë çelja e autoritetit për hapjen e dosjeve të sigurimit. Dosja e parë e cila u njoftua se do hapej ishte ajo e Musine Kokalarit. Hapja e pikërisht kësaj dosjeje të parë u interpretua jo pak si një show mediatik nga ana e Ministrisë.
Po fill pas këtyre interpretimeve me një status të gjatë ka reaguar dhe Ministrja e Kulturës Mirela Kumbaro. Në një postim të saj në Facebook, ministrja Kumbaro njofton se ky kalendar fillon pikërisht me nisjen e procedurës për hapjen e dosjes së ish-Sigurimit për Musine Kokalarit, si një ftesë për të zbuluar deri në fund të keqen dhe për të mos harruar kurrë.
“Me besim të fortë në punën e pasionin e Gentiana Sules, e përshëndes dhe mbështes punën e Autoritetit për Informimin mbi ish-Dokumentet e Sigurimit të Shtetit në ruajtjen e kujtesës dhe studimit të historisë së hidhur të regjimit komunist. Nuk mund të bënim zgjedhje më të mirë se ta fillonim këtë punë me dosjen e një figure të veçantë e frymëzuese si Musine Kokalari, gruaja simbol e rezistencës dhe intelektualja mendjehapur në kohët e mbyllura, të cilën së shpejti do ta kemi në qendër të vëmendjes në ditën e 100 vjetorit të lindjes. Mirënjohje familjes Kokalari për bashkëpunimin dhe besimin!”, shkruan Kumbaro. (E.K/SHUPLAKA)
Discussion about this post