Sot në Strasburg, parlamentarët europianë diskutuan progresraportin vjetor për nëntë vendet anëtare në monitorim, ku bën pjesë edhe Shqipëria.
“Miratimi i amandamenteve kushtetuese i ka hapur rrugën një reforme tërësore dhe gjithëpërfshirëse të gjyqësorit, në mënyrë që të sigurohet paanësia dhe pavarësia nga influenca dhe presioni kryesisht politik”, theksohet në rezolutën e miratuar nga Asambleja Parlamentare e Këshillit të Europës.
Zbatimi praktik i reformës në drejtësi dhe në veçanti i Vettingut, rivlerësimi i të gjithë gjyqtarëve dhe prokurorëve shiqptarë mbetet kushti kryesor për hapjen e negociatave të anëtarësimit në BE dhe reforma në drejtësi shihet si kontribuesi kryesor në luftën ndaj korrupsionit dhe krimit të organizuar, kanë deklaruar reporterët Andrej Hunko dhe Joseph O’Reilly.
“Klima e tensionuar politike vijon në Shqipëri. Është me rëndësi që të arrihet konsensus mes të gjithë faktorëve politikë për reformën elektorale në mënyrë që të gjejnë zgjidhje problematikat e shfaqura në zgjedhjet e kaluara, mbi bazën e rekomandimeve që ka dhënë Komisioni i Venecias dhe Asambleja Parlamentare e Këshillit të Europës”, theksohet në raport.
Reporterët Hunko dhe O’Reilly kanë nënvizuar se ndryshimet në kodin elektoral shqiptar nuk janë në vetvete të mjaftueshme për të zgjidhur problematikat që shfaqen gjatë ditës së zgjedhjeve, ndaj për këtë kërkohet një angazhim politik nga të gjithë faktorët politikë për të zhvilluar zgjedhje të vërteta demokratike me 18 dhjetor.
Vijimi i procesit të demikralizimit ka zënë një pjesë të rëndësishme në raportin për Shqipërinë, gjithashtu Këshilli i Europës ka kërkuar që të krijohen kushtet për zgjedhjen përfundimtare të problemit të pronave, po ashtu edhe krijimin e kushteve për një media më profesionale e tw pandikuar nga politika.
Për sa kohë që nuk do të ketë rezultate të prekshme dhe konsensus politik për reformat, Shqipëria do jetë pjesë e listës së monitorimit përkrah Armenisë, Azerbajxhanit, Bosnje Hercegovinës, Gjeorgisë, Moldavisë, Federatës Ruse, Serbisë dhe Ukrainës.(K.P/ SHUPLAKA)
