Ish-Kryeministri, Sali Berisha, pranon se është tërhequr në mënyrë përfundimtare nga drejtimi i Partisë Demokratike.
Gjatë një interviste në emisionin “Fakt”, pyetjes së gazetarit Çim Peka se çfarë do të ndodhë me Bashën në rast se humbet zgjedhjet, Berisha përgjigjet se këtë do ta vendosë vetë partia.
“Në bindjen time, në vlerësimin tim, PD do i fitojë zgjedhjet, por për fatin e çdo njeriu në hierarkinë e kësaj partie është gjithçka në dorën e saj dhe Sali Berisha pas përfundimit të asaj fushate elektorale në parti që isha i detyruar ta mbikëqyrja në një farë mënyre, nuk përzihet më në zhvillimet e saj”, iu përgjigj Berisha pyetjes së gazetarit.
Më pas ai shtoi: “Unë jam në mënyrë përfundimtare i tërhequr, mbështes në ato mënyrat e mia brenda mundësive, por kurrë nuk i përzihem asaj, as në fatin e tij, as në fatin e atij, as në fatin e kësaj, e as në fatin e asaj”.
Ish-kryeministri deklaroi se nuk ndjen asnjë keqardhje për tërheqjen nga lidershipi i PD-së, pas humbjes së zgjedhjeve të kaluara.
Sakaq, Berisha pranon se pavarësisht se është tërhequr nga drejtimi i PD-së, ai vazhdon të ndikojë jo vetëm në drejtimin e partisë, por edhe në jetën politike të vendit. (D.D/Shuplaka)
Discussion about this post