Ministri i Punëve të Brendshme, Saimir Tahiri, ka prezantuar sot reformën “Popullimi”, të cilin e ka cilësuar si reformën më të madhe dhe më të rëndësishme, e cila do t’i japë fund errësirës në marrëdhënien qytetar-shtet, në një kohë kur Shqipëria është zhvilluar gjatë dy dekadave.
Tahiri renditi tre detyrat kryesore në kuadër të kësaj reforme. Ai bëri me dije se qyteravë do u lihet kohë 6 muaj për t’u regjistruar falas. Pas kësaj periudhe kohore, ata qytetarë që nuk do të binden, do të përballen me gjobitjen e tyre.
“Detyra nr. 1 ka qenë përcaktimi i modelit të adresës. Modeli i ri i adresës do të përmbajë emrin e Bulevardit, numrin e ndërtesës, numrin e njësisë administrative. Kjo është shumë e rëndësishme. I jep përgjigje pyetjes “Sa jemi dhe ku banojmë”.
Detyra nr. 2 e jona ka të bëjë me pasqyrimin në kohë të lëvizjes së popullsisë. Në qytete të mëdha si Tirana apo Durrësi ka plot që jetojnë në to por vendbanimi kryesor është në qytete të tjera. Jo pa shkak kemi lënë një hapësirë 6-mujore që kjo të bëhet falas. Ne njohim prapambetjen dhe mirëkuptojmë hapësirën. Nuk do pranojmë në vijim qytetarë që jetojnë në mënyrë permanente në Tiranë, por adresën e kanë në një qytet apo njësi tjetër. Pas gjashtë muajve, qytetarët që nuk do të deklarojnë, do të gjobiten.
Detyra nr. 3 është më e rëndësishmja. Nga sot, 1200 intervistues do të trokasin derë më derë. Na duhen të dhëna të plota dhe kjo është e vetmja mënyrë. Në intervistim përfshihet pushteti vendor që ka një rol themelor. Ne nuk do të pranojmë mungesë përgjigje nga qytetarët, refuzim, vakum. Në këtë proces do të përfshihet policia nëse qytetari refuzon.
Kjo është reforma më e madhe që kemi ndërmarrë deri më sot. Ne jemi votuar për punë, jo për fjalë dhe i dedikohemi punës, jo fjalëve. Ky projekt do të shërbejë për qytetarët. Ky nuk është proces që e bëjmë ne, i kemi detyrim qytetarëve.”, u shpreh ndër të tjera ministri Tahiri. (XH.A/SHUPLAKA)
Discussion about this post