Gjykata e Tiranës ka rrëzuar kërkesën e Mark Frrokut, i cili kërkoi riekspertim të pasurisë së tij me pretendimin se ekspertja kontabël nuk kishte licencë.
Prokuroria e Përgjithshme vërtetoi pasurinë e pajustifikuar prej 2 milionë dollarësh të Mark Frrokut, në sajë të ekspertimit të kryer nga ekspertja Greta Danku, e cila hartoi raportin e kërkuar. Deklarata e saj në një seancë të disa ditëve më parë, ku u shpreh se nuk kishte licencë, shkaktoi debate të forta.
Ajo deklaroi në gjykatë se zotëron një diplomë në Financë Kontabilitet dhe se veprimtarinë e saj e ka të bazuar në kuadrin ligjor në fuqi, për shkak se në kohën që u punësua në Prokurorinë e Përgjithshme, nuk ishte kriter pajisja me licencën e Ekspertit Kontabël.
Ekspertja bëri me dije se përllogaritjet i kishte bazuar në dokumentet që Prokuroria i kishte vënë në dispozicion, duke dalë në përfundimin se Frroku zotëron pasurinë prej 2 milionë dollarësh të pajustifikuar.
Nga ana tjetër, avokatët e kanë cilësuar analizën e saj si të njëanshëm dhe të paplotë, duke kërkuar caktimin e një eksperti të pavarur që të vlerësojë pasurinë e Mark Frrokut.
Ky i fundit akuzohet për vrasjen vite më parë në Belgjikë të Aleksandër Kurtit. Mbi të rëndon edhe akuza e fshehjes së pasurisë, ndërtime të paligjshme, pastrim parash. (XH.A/SHUPLAKA)
Discussion about this post