Formularët A1 dhe A1Z do të dalin më 10 mars 2017. “Përmes këtyre formularëve, maturantët e këtij viti do të bëjnë përzgjedhjen e atyre lëndëve që do të japin si provime me zgjedhje.”, bën me dije “GSH”. Në dokumentin me procedurat dhe afatet e përcaktuara dhe firmosur nga ministrja Nikolla më 31 janar 2017, janë përcaktuar edhe procedurat se si do të procedohet me individët që kanë mbaruar shkollën e mesme para 2011-ës dhe duan të aplikojnë në universitet.
“Kandidatët që kanë marrë dëftesë pjekurie para vitit 2011 dhe dëshirojnë të aplikojnë për studime në universitet, t’u njihen provimet e detyruara ose provimet e njëvleftshme me to, të njehsuara nga DAR/ZA-të. Këta kandidatë, në rastet kur nuk kanë dhënë provimet me zgjedhje ose i kanë dhënë dhe nuk kanë rezultuar kalues, kanë të drejtën të japin provime me zgjedhje kur e kanë të nevojshme për plotësimin e kritereve të pranimit, të përcaktuara nga universitetet”, përcaktohet në nenin 11 të rregullores.
Referuar udhëzimit të ministres së Arsimit, Lindita Nikolla, më 30 dhjetor 2016, maturantët e këtij viti në shkollat e mesme joprofesionale kanë me detyrim 3 provime: Gjuhë Shqipe e Letërsi, Matematikë dhe Gjuhë e Huaj.
Ata do të mund të zgjedhin edhe mes 21 lëndëve me zgjedhje, ku kanë të drejtën të zgjedhin 2 prej tyre. Sipas udhëzimit të MAS-it, maturanti ka të drejtë të zgjedhë 2 prej tyre, pavarësisht nëse i ka zhvilluar në mësim ose jo, ndërkohë që shuma e krediteve nuk mund të jetë më e vogël se 8. (XH.A/SHUPLAKA)
