Tmerr në autobusin e Kristalit në Tiranë. Shoferi frenon në mënyrë të papërgjegjshme pasi po ecte me shumë shpejtësi, duke rrezikuar seriozisht jetën e një fëmije dhe nënës së tij.
Djali dhe nëna janë rrëzuar shumë keq këtë mëngjes në shkallët e autobusit, teksa kanë qenë duke u mbajtur në hekurat ku mbahen zakonisht pasagjerët. Hekuri është shkëputur menjëherë.
Djali i moshës 4 vjeç (të cilit po i ruajmë identitetin), siç e shikoni edhe në foto ka pësuar dëmtime afër syrit dhe në hundë. Fatmirësisht nuk ka pësuar dëmtime në kokë, por fotoja flet qartë për pasojat.
”Po dridhem e tëra. Shoferi frenoi si i çmendur. Unë dhe çuni ramë në shkallët e autobusit të dy. Hekuri u shkëput. Autobusi ishte krejtësisht i amortizuar. Mezi kam marrë veten nga tronditja”, rrëfen nëna pas aksidentit.
Autobusi ku ndodhi ngjarja e frikshme, ndaj shoferit të të cilit dhe ndaj kompanisë që e zotëron duhen të merren menjëherë masa, është me targa ”AA108NM”.
Djali është dërguar nga prindërit në spital ku ka marrë mjekimin e nevojshëm.
Një papërgjegjshmëri totale, e parë shpeshherë në autobusët e Tiranës, e drejtuesve që rrezikojnë jetën e qytetarëve. Më në fund një nënë denoncoi atë që ndodh përditë në urbanët e Tiranës.
Kush i kontrollon këta drejtues? Kush i kontrollon kompanitë që kanë në dorë transportin publik? A funksionojnë drejtoritë e Bashkisë së Tiranës dhe kontrollorët e saj?! Fatmirësisht djali dhe nëna e tij shpëtuan vetëm me lëndime, por kjo situatë duhet të marrë fund njëherë e përgjithmonë./SHUPLAKA
Discussion about this post