Nis ndërtimi i urës së re në fshatin Bastar i Mesëm të Njësisë Zall-Bastar. Në inspektim ka qenë i pranishëm kryebashkiaku i Tiranës Erion Veliaj dhe deputeti socialist Xhemal Qefalia.
“Për të gjithë ata banorë që kanë 25 vite që presin të lidhen me një urë me pjesën tjetër të Tiranës, ky është një lajm shumë i mirë. Ndaj, do doja shumë që të ecnim shpejt dhe të mos lejonim që kushtet atmosferike të na e pengonin këtë proces. Kemi dy investime të rëndësishme në Zall Bastar: atë që e lidh Zall Bastarin me Tiranën dhe me Zall-Dajtin, e gjithë pjesën tjetër rurale të Tiranës, sigurisht edhe fshatrat që lidhen mes tyre, ku marrin shërbimet shëndetësore”, tha Veliaj.
Qefalia, falenderoi kryebashkiakun Veliaj për premtimin e mbajtur. “Është premtim që kryetari i Bashkisë e ka bërë që në takimin e parë në Këshillin Bashkiak, ku u shprehur se qytetarët e Tiranës janë të barabartë, si ata që jetojnë në qendër, edhe ata që jetojnë në periferi. Më lejoni, zoti kryetar, që në emër të gjithë banorëve t’ju falenderoj për një premtim të mbajtur”, tha Qefalia, duke shtuar se me këtë investim, Bashkia e Tiranës hap siparin e zhvillimit edhe të gjithë zonës në tërësi.
Fshati Bastar i Mesëm i Njësisë Administrative Zall Bastar ndodhet 22 kilometra larg qendrës së Tiranës. Ura do t’u shërbejë banorëve të kësaj zone, duke lehtësuar qarkullimin e automjeteve dhe të produkteve bujqësore dhe blegtorale drejt tregjeve të Tiranës. Ura do të ketë kapacitet mbajtës 30 ton dhe do të jetë e pajisur edhe me sinjalistikë vertikale. (V.G/SHUPLAKA)
Discussion about this post