Në fjalën e tij në nderim të shkrimtarit të madh shqiptar, Dritëro Agolli, kryeministri Edi Rama theksoi ndër të tjera në fillim se ndodhej aty për shkak të detyrës, por do të donte t’i bënte bisht kësaj ceremonie, duke marrë në konsideratë qëndrimin e poetit për jetën dhe vdekjen.
Gjatë gjithë fjalës së tij, Rama iu drejtua kujtimit të shkrimtarit përmes vargjeve që ai la pas. Duke sjellë në vëmendje vargje nga poezi të ndryshme e të njohura të tij, kryeministri u ndal tek qëndrimi i Dritëro Agollit ndaj jetës dhe për më tepër vdekjes.
“Dritëroi i drejtohej vdejkjes me “Ti”. La gruan Sadijen dhe iku me vdekjen. Ai i luante syrin vdekjes. Kjo ikje e Dritëroit është një kthim përfundimtar i tij andej nga erdhi. Në këtë sallë, ai ka dhënë ndoshta shfaqjen më emocionuese të tij. Qenia e tij e jetuar për vite e vite në kontraditën dramatike mes robit të natyrës dhe njeriut të 26 viteve më parë dhe klithmës historike të tij. Ai jetonte në dehje përfundimtare. Unë besoj se tek vdekja, ai shihte të vetmen mundësi për t’u kthyer tek parajsa e vendit ku kishte lindur. Unë desha thjesht të lidh ca fjalë për të nderuar njeriun që jetonte brenda personazhit të tij e shfaqej mahnitshëm përmes vargjeve të tij. Më pat thënë dikur: “Dëshira më e madhe e imja në këtë jetë është të fle, të zgjohem për të fjetur.”, u shpreh ndër të tjera Rama.
Ai e mbylli fjalën e tij me epitafin që la për vete Dritëro Agolli.
Ajo çka u vu re në këtë ceremonial shtetëror organizuar nga Këshilli i Ministrave ishte veshja jozyrtare e Ramës, ku spikatën pantallonat si poture dhe bluza e bardhë. (XH.A/SHUPLAKA)
Discussion about this post