Udhëtonte drejt Shkupit, pranga 25-vjeçarit me 2 kg drogë në çantën sportive (FOTO)

Shtetasi Redman Tafilaj 25 vjeç është vënë në prangat e Policisë Kufitare të Qafë-Thanës pas kontrollit të ushtruar në çantën e tij sportive.

I riu udhëtonte me një linjë autobusi në drejtim të Shkupit, kur gjatë kontrollit të ushtruar, policia gjeti dhe sekuestroi 2 pako me 3 kg drogë e llojit kanabis.

Detaje të Policisë së Durrësit:

Brenda 24 orëve, Policia Kufitare godet rastin e dytë të trafikimit të lëndëve narkotike. Sekuestrohen 2 pako me peshë 3 KG lëndë e dyshuar si narkotike Cannabis Sattiva. Arrestohet në flagrancë poseduesi i lëndës.

Shërbimet e Policisë Kufitare të Qafë-Thanës, në bashkëpunim me Specialistët e Seksionit për Narkotikët në DVP-Korçë, bënë kapjen dhe arrestimin në flagrancë të shtetasit :

Redman Tafilaj, 25 vjeç, banues në Durrës.

Shtetasi i mësipërm udhëtonte si pasagjer me një linjë autobusi që kishte si destinacion qytetin e Shkupit, Maqedoni. Në dalje të Republikës së Shqipërisë, gjatë kontrollit të ushtruar, në çantën e tij sportive, shërbimet e Policisë Kufitare kanë konstatuar dhe sekuestruar në cilësinë e provës materiale :

2 pako të mbështjella me letër natriban, me peshë 3 Kg lëndë e dyshuar si narkotike Cannabis Sattiva.

Poseduesi i lëndës, u arrestua në kushtet e flagrancës për veprën penale: “Trafikimi i narkotikëve, mbetur në tentativë” ndërsa materialet hetimore i kaluan Prokurorisë të Krimeve të Rënda në Tiranë, për veprime të mëtejshme.