Braktisja e komisioneve, deputeti i PD-së: Do zgjasë deri në fund të këtij Parlamenti!

Grupi i Partisë Demokratike do të vijojë braktisjen e komisioneve parlamentare, deri në fund të këtij parlamenti.

Të paktën kështu ka deklaruar deputeti i PD-së, Gerti Bogdani, i cili ishte i ftuar në studion e e lajmeve të “Ora News”.

Sipas Bogdanit qeveria ka rënë që në momentin kur ministrat dalin dhe akuzojnë kryeministrin apo kolegët e tyre për korrupsion ose shantazhe.

“Qeveria ka rënë, në momentin që ministrat dalin dhe akuzojnë kryeministrin për korrupsion, në momentin që ministrat dalin dhe akuzojnë kolegët e tyre për shantazhe politike apo kriminale, në momentin kur Shqipëria ka hapur dyert për trafikun e drogës dhe në momentin kur sot kemi një qeveri jo legjitime, ku hidhet dhe pritet topi se kush do ta arrestojë Balilin, apo i kujt është Balili, ndërkohë që ky është një Balil i vetëm që ka me dhjetra të tjerë  që lëvizin lirshëm kjo qeveri nuk është më legjitime dhe si i tillë puna në komisionet parlamentare nuk mund të jetë normale sepse nuk mund të jemi më në një parlament normal dhe prandaj ka qenë vendimi i tillë i grupit parlamentar të PD.”, tha Bogdani.

Megjithatë deputeti shton se ndryshe nga ç’bëhet me komisionet parlamentare, opozita nuk do t’i braktisë seancat parlamentare, pasi sipas tij janë e vetmja mënyrë ku opozita mund të thotë fjalën e saj.

“Jo sepse fatkeqësisisht parlamenti dhe foltorja e parlamentit është i vetmi podium sot ku zëri i opozitës mund të dëgjohet. E them fatkeqësisht duke pasur parasysh situatën e mediave në vend ku kemi një formë të re diktature. Nëse në kohën e diktaturës kishte një Televizion dhe një gazetë, sot kemi dhjetra televizione por askush që   flet zërin real të qytetarëve shqiptarëve, të gjithë që këndojnë këngën e qeverisë, me ndonjë përjashtim si Ora Neës dhe prandaj dhe mbase i ndëshkuar në çështjen e licencave, kur sot kemi një qeveri që kontrollon mediat, pronarët e mediave dhe një qeveri që po tenton të mbyllë portalet online.”, shtoi ai.

Bogdani sqaron se kohëzgjatja e braktisjes së komisioneve parlamentare është e papërcaktuar.

“Në këtë moment është e papërcaktuar, por duke qenë se për ne kjo qeveri ka rënë sepse është vetëshkarkuar në sytë e qytetarëve shqiptarë do të jetë deri në fund të këtij parlamenti.”, thotë deputeti. (D.D/Shuplaka)