Në kuadër të aksionit për dorëzimin vullnetar të armëve në të gjithë vendin në 24 orët e fundit. janë dorëzuar 25 armë zjarri, 12.980 fishekë, 89 granata, 89 ndezës, 5 predhë kundër tank e 65 krehra fishekësh.
Sipas policisë shtetit po vijojnë takimet sensibilizuese në të gjithë vendin në kuadër të ndërgjegjësimit për dorëzimin vullnetar të armëve. Takimet po zhvillohen në të gjitha Njësitë Administrative, me të gjithë Kryetarët e fshatrave ku pjesë e këtyre takimeve janë bërë dhe nxënësit e shkollave të mesme, studentët si dhe stafet pedagogjike.
Policia e Shtetit në të gjithë vendin po vijon fushatën e trokitjes derë më derë nga Specialistët e Policisë së Zonave për të ndërgjegjësuar banorët për domosdoshmërinë e dorëzimit të armëve që mbajnë pa leje. Policia e Shtetit vlerëson si të suksesshme këtë nismë dhe në këtë kuadër falënderon të gjithë ata banorë që iu përgjigjën thirrjes duke dorëzuar vullnetarisht armët.
Gjithashtu Policia e Shtetit falënderon në veçanti nxënësit dhe studentët që janë bërë pjesë e fushatave ndërgjegjësuese dhe sensibilizuese duke kontribuuar në rritjen e parametrave të sigurisë. Policia e Shtetit iu bën thirrje banorëve që mbajnë armë pa leje, t’i dorëzojnë ato brenda afatit të caktuar. (J.V/Shuplaka)
