Nxënësit e klasave të nënta do u nënshtrohen provimeve të lirimit, të cilat do të zhvillohen brenda muajit Qershor, duke nisur në datën 12. Ata do i nënshtrohen tre provimeve të arsimit bazë, ku përfshihen lëndët Gjuhë Shqipe, Matematikë, Gjuhë e Huaj.
“Ditën e djeshme Ministria e Arsimit ka miratuar udhëzimin për zhvillimin e provimeve kombëtare të arsimit bazë për vitin shkollor 2016-2017, ku përcaktohet se harku kohor i zhvillimit të këtyre provimeve do jetë data 12 qershor deri më datë 22 qershor 2017.”, bën me dije “GSH”.
Fillimisht, nxënësit e klasave të 9-ta do i nënshtrohen provimit të parë që është Gjuha e Huaj më 12 qershor, për të vazhduar me provimin e Gjuhës Shqipe më 19 qershor dhe me Matematikën më 22 qershor.
Provimet kombëtare të arsimit bazë, fillojnë në orën 10:00 dhe zgjasin 2 orë e 30 minuta. Sipas udhëzimit të MAS-it, nxënësit e pakicave kombëtare greke dhe maqedonase, zhvillojnë edhe provimin kombëtar të arsimit bazë në lëndën Gjuhë amtare. Ky provim do të zhvillohet në datën 16 qershor 2017.
Sa i përket testit të Gjuhës së Huaj, në udhëzimin e MAS-it, testi i gjuhës së huaj hartohet në përputhje me gjuhën e cila në planin mësimor të arsimit të mesëm të ulët trajtohet si gjuhë e huaj e detyruar në nivelin gjuhësor A2. Lista e gjuhëve të huaja që do të jepen si provim i detyruar janë: anglisht, italisht, frëngjisht dhe gjermanisht.
PROVIMET KOMBËTARE TË ARSIMIT BAZË
1. Gjuhë Shqipe – më 19 qershor 2017
2. Matematikë – më 22 qershor 2017
3. Gjuhë e huaj – më 12 qershor 2017
• Gjuhë amtare – për nxënësit e pakicave kombëtare greke dhe maqedonase, do zhvillohet më 16 qershor 2017
• Provimet kombëtare të arsimit bazë fillojnë në orën 10:00 dhe zgjasin 2 orë e 30 minuta.
• Lista e gjuhëve të huaja që do të jepen si provim janë: anglisht, italisht, frëngjisht dhe gjermanisht
Discussion about this post