Detaje të reja janë zbardhur nga ngjarja e rëndë shënuar ditën e djeshme në qytetin e Korçës, ku një 32-vjeçar tentoi të digjte nënën e tij duke e lyer me benzinë dhe i vënë më pas flakën.
Thuhet se shkak i konfliktit mes tyre që çoi në këtë veprim tragjik është bërë refuzimi i së ëmës për t’i dhënë para. Për shkak të kushteve të vështira ekonomike, 52-vjeçarja Mimoza Sadikllari nuk ia ka plotësuar kërkesën të birit dhe pas një grindje të ashpër Emiljan Tushini ka ndërmarrë aktin fatal.
Pasi i ka vënë flakën dhe është larguar, 52-vjeçarja është përpjekur ta shuajë vetë zjarrin dhe më pas ka kërkuar ndihmën e së bijës që jetonte aty pranë. Ajo u transportua me urgjencë në spital, ku ndodhet jashtë rrezikut për jetën.
“Specialistët e Sektorit për Krimet e Rënda, në Drejtorinë Vendore të Policisë Korçë, bënë kapjen dhe arrestimin në flagrancë të shtetasit : Emiljan Tushini, 32 vjeç, banues në Korçë (i dënuar më parë për veprat penale: “Vjedhja” dhe “Plagosje e lehtë me dashje”). Arrestimi i tij u bë pasi më datë 13.02.2017, në lagjen nr 8 në Korçë, në banesë dyshohet se ky shtetas pas një konflikti për motive të dobëta me nënën e tij shtetasen M.T, 52 vjeç, i ka hedhur kësaj të fundit lëndë djegëse (benzinë) në trup dhe më pas i ka vënë flakën.
Emiljan Tushini, është larguar menjëherë nga vendi i ngjarjes, por falë veprimeve të shpejta e të mirëkoordinuara të shërbimeve policore, u bë e mundur kapja dhe arrestimi i tij, si i dyshuar për veprën penale : “Vrasja për shkak të marrëdhënieve familjare, e mbetur në tentativë” parashikuar nga nenet 79/c dhe 22 të Kodit Penal. Materialet proceduriale iu referuan Prokurorisë të Rrethit Gjyqësor Korçë, për hetime të mëtejshme.”, bëhej me dije një ditë më parë nga policia.
Discussion about this post