I forti i Vlorës, dënuar me burgim të përjetshëm, “Gaxhai” ka rrëfyer gjithashtu në intervistën e dhënë për gazetën “Shekulli” edhe pengun e tij, si dhe atë që e shtyu t’i futej botës së krimit.
Gazmend Braka e ka pranuar tashmë fatin e tij, ndoshta edhe sepse ndjen pendesë për të shkuarën. Prej 2005-ës, ai nuk ka tentuar më të arratiset, shkon mirë me të burgosurit, gatuan vetë në qelinë e burgut dhe mik më të mirë ka televizorin.
Nëse i duhet të kthejë kokën pas, ai shprehet se pengu më i madh është politika. Për futjen në botën e krimit, “Gaxhai” akuzon politikën, pushtetarët.
Ai ka vetëm një kërkesë: Qeveritarët të bëjnë një ligj për vitin 1997.
Gazmend të gjithë të njohin si “i forti i Vlorës” dhe person i rrezikshëm, si ndihesh aktualisht?
Në ato kohë është e vërtetë që ashtu na njihnin. Por duhet të kuptojmë një gjë. Të fortët dhe të rrezikshmit janë jashtë. Ah ne! Ne që ndodhemi sot duke vuajtur dënimin me burgim të përjetshëm them me plot bindje se jemi viktima. Nuk do shumë për të kuptuar. Ne jemi viktima të politikës së mbrapshtë të vitit 1997. Tani kur e mendoj dhe e analizoj nxjerr këtë rezultat.
Ndiheni të përdorur nga politikanët?
Bëj përgjegjës të gjithë politikanët për këtë problem. Ne jemi dënuar për krimet që kemi kryer. Por kjo s’do të thotë se duhet të qëndrojmë përjetë në qeli. Pushtetarët duhet të bëjnë një ligj të veçantë për’97. Ne ishim të vegjël, na kapi ajo valë. Armët nuk i kishim në banesa. Ato na i dha vetë politika e cila lejoi ardhjen e atyre trazirave.
(XH.A/SHUPLAKA)
