Ministri i Mirëqenies Sociale, Blendi Klosi dhe aktivisti i Shoqërisë Civile, Panajot Soko kanë debatuar sot lidhur me ndihmat ekonomike që marrin familjet në nevojë.
I ftuar në “Njerëz në Fokus”, Klosi tha se po kërkohet të dyfishohet dhe trefishohet ndihma ekonomike për familjet e varfëria.
“Qëllimi është që familjet të dalin nga varfëria. Nuk është e vërtetë që bëhet për të reduktuar mbështetjen buxhetore. Po kërkohet që të dyfishohet apo trefishohet ndihma ekonomike për familjet e varfërve. Skema kërkon të targetojë më mirë varfërinë. Varfëria duhet të targetohet nga indikatorët që e tregojnë. Të gjitha familjet që evidentohen si të varfra, do të marrin 80 mijë lekshin bazë, si dhe më shumë në varësi të numrit të fëmijëve. Asnjë familje nuk e humbet ndihmën ekonomike nëse ka televizor apo lavatriçe. Ka 52 indikatorë që tregojnë nëse familja është e varfër apo jo. Pyetet çdo familje për pasurinë që kanë. Ne do luftojmë abuzivizmin, se ka familje që kanë vila 2-3 katëshe e marrin ndihmë ekonomike. Nga 3 vite më parë sot asnjë familje nuk e ka humbur ndihmën ekonomike.”, tha ministri.
Megjithatë, sipas aktivistit Panajot Soko, ka familje që u janë hequr ndihmat ekonomike vetëm për shkak se kanë patur një televizor në shtëpi.
“Këto nisma bëhen për të balancuar buxhetin e shtetit. Ideja është të ndërpriten shpenzimet e shtetit për ndihmën ekonomike. Ka pasur kufizim te shtresa më në nevojë. Ka një sjellje arrogante ndaj të varfërve. Ka familje që kanë marrë televizor me ngjyra dhe pastaj u kanë hequr ndihmën ekonomike.”, tha Soko.
Megjithatë sipas ministrit kjo nuk është absolutisht e vërtetë. Madje ai sqaroi se po punojnë edhe për ndihmat ekonomike për njerëzit me aftësi të kufizuara. (D.D/Shuplaka)
