Para nisjes së mbledhjes së kryesisë së LSI-së, kreu i saj Ilir Meta shprehu vlerësimin e protestës së opozitës, të cilën e cilësoi si paqësore, ama kërkoi që ajo të mos bëhej problem për zbatimin e Reformës në Drejtësi.
“Po punojmë për platformën politike, programore dhe elektorale, jo vetëm për zgjedhjet por për katër vitet e ardhshme, përpara se të vazhdojmë mbledhjen e programuar, do doja të shprehja disa shetësime.
Nuk mund të mos përmend shetësimin që kam për protestën e opozitës të cilën dua ta vlerësoj për protestën paqësore, por që nuk i shërben vazhdimësisë për reformat kyçe dhe vazhdimit të zbatimit të Reformës në Drejtësi.
Shpreh vendosmërinë e LSI-së dhe timin, për kontributin tonë maksimal për një klimë sa më bashkëpunuese, në rezolutën e PE-së duhet inkurajuar më shumë ana tjetër, që kërkon dy elementë kyç, në mënyrën më kushtetuese, ligjore dhe transparente, njëkohësisht edhe një klimë mirëbesimi për standartin më të lartë që duhet të arrijnë zgjedhjet, që janë gjithashtu kyç për hapjen e negociatave, por edhe për zbatimin e reformës në drejtësi edhe pas 18 qershorit, pavarësisht rezultatit të forcave politike, përfshirë LSI-në.
Më 22 korrik ku ajo u miratua sipas standartit të Venecia, ne kemi tre fjalë kyçe deri në fund të zbatimit të kësaj reforme që janë: kushtetuta, ligji dhe transparenca. Kushtetutën e keni, ligjin e keni, ajo që na duhet është transparencë e plotë dhe bashkëpunimi për të ecur drejt rrugës që do kthejë besimin e qytetarëve shqiptarë në drejtësi.
Një proces jetik është edhe thellimi i dekriminalizimit, detyrim që buron nga legjislacioni, por edhe një borxh.”, tha Meta. (D.D/Shuplaka)
Discussion about this post