Pas ndërhyrjes së Llallës, Gjykata e Lartë rrëzon Selmanin, lë në burg 3 autorët e “Masakrës së Çoles”

Gjykata e Lartë ka lënë në fuqi vendimin e Gjykatës së Apelit të Vlorës për tre autorët e Masakrës së Çoles në Prill të 2015-ës.

Mësohet se Gjykata e Lartë ka vendosur masën e dënimit “burg përjetë” për Aleksandër Llanaj dhe 35 vjet burg për dy të akuzuarit e tjerë, shtetasit Bertil Aliaj dhe Ani Begaj.

Paraditen e sotme, Prokurori i Përgjithshëm, Adriatik Llalla pezulloi nga detyra Drejtoreshën e Drejtorisë Gjyqësore, Alma Muça, dhe prokurorin e Prokurorisë së Përgjithshme, Artur Selmani. Ai urdhëroi nisjen e hetimit ndaj tyre, për shkak të qëndrimit të dyshimtë që mbajtën në Gjykatën e Lartë lidhur me këtë ngjarje të ndodhur në vitin 2015.

Pak ditë më parë, familjarët e viktimave të kësaj masakre, i dërguan një letër Kreut të Lartë të Shtetit, ku shpreheshin se gjyqi është korruptuar. (XH.A/SHUPLAKA)