Deputeti i opozitës Kastriot Islami ndan mendimin se mandati i Edi Ramës si kryeministër është mbyllur. Dhe për këtë, ai nuk bazohet vetëm tek mendimi i opozitës, e cila e sheh këtë qeveri si më të korruptuarën, më të lidhurën me krimin dhe shkatërruese të zgjedhjeve të lira e të ndershme.
Sipas Islamit në shkrimin e tij për “Syri.net”, edhe socialistët e ndershëm kërkojnë dhe presin me padurim largimin e Ramës që shkatërroi partinë e tyre. Ai thekson se ka segmente socialistësh që janë shumë agresivë dhe radikalë me Ramën.
“Edhe socialistët e ndershëm, ndonëse mund të mos i bashkohen objektivave të opozitës, kërkojnë dhe presin me pa durim largimin me çdo kusht e mjet të drejtuesit të Rilindjes, Ramës që shkatërroi partinë e tyre dhe pasi i mashtroi duke i marrë votën i la në mes të katër rrugëve; madje ka segmente socialistësh që janë shumë agresive dhe radikale me Ramën dhe shpurën e tij sektare duke kërkuar deri edhe ndëshkimin e tyre.”, shprehet Kastriot Islami.
Më tej, ai shprehet se përveç të djathtëve e të majtëve të ndershëm, janë dhe partnerët ndërkombëtarë, përfshirë “miqtë” e së majtës që kanë arritur në përfundimin se me gafat e tij kryeministri është jo vetëm i pambrojtur por duhet të largohet për të mos u kthyer në shkakun e vetëm e kryesor të trazirave sociale e të destabilitetit të vendit.
“Edhe partnerët, ndërkombëtarë, përfshi edhe “miqtë” e së majtës apo të Ramës personalisht kanë arritur në përfundimin se me gafat dhe marrëzitë e tij, sidomos ato të lidhura me kriminalizimin e qeverisjes dhe përfshirjen e tij direkt së bashku me ministrin e brendshëm në kultivimin e kanabisit dhe trafiqet e narkotikëve e veçanërisht përdorimin e tyre për të manipuluar zgjedhjet, Rama është jo vetëm i pambrojtshëm por duhet larguar për të mos u kthyer në shkakun e vetëm e kryesor të trazirave sociale e të destabilitetit të vendit. Ka shumë prej tyre që si arsye për largimin e tij kanë politikën e një “nacionalizmi apo populizmi aguridh” për çështjet themelore që shqetësojnë rajonin dhe për të cilat Shqipëria gjithnjë është vlerësuar “konstruktive dhe në rezonancë me faktorët e rëndësishëm globalë”. Dhe ajo që mbetet ndoshta nga më të rëndësishmet është ndërhyrja e tij e marrë në zgjedhjet presidenciale të SHBA duke e stigmatizuar më negativisht se kushdo tjetër kandidatin Trump dhe shkuar aq larg sa ti kujtonte votuesve amerikanë se zgjedhja e tij do të shkaktonte prishjen e marrëdhënieve Shqipëri-SHBA. Jo pa ndikim është edhe indikacioni i raportit konfidencial të OSBE për zotërimin nga Rama të një pasurie prej 200 milion euro të fshehur në llogari off shore. Madje të gjithë partnerët e rëndësishëm ndërkombëtare janë të shqetësuar nga përfundimi i një eksperti amerikan në gazetën The Hill se ‘për shkak të kanabisit Shqipëria është kthyer në hallkën më të dobët të NATO ku operacionet e aleancës së veriut mund të rrezikoheshin”., ndan mendimin Kastriot Islami.
(XH.A/SHUPLAKA)
Discussion about this post