Pas reagimit të deputetit të Partisë Socialiste Pandeli Majko, pedagogja Nevila Xhindi fshin foton që shkaktoi aq shumë komente në rrjetet sociale.
Në foton e publikuar nga Xhindi shihet djali i deputetit Gjergji Majko, i cili me dy gishtat lart pozon për kameran. Por kjo u keqinterpretua nga mediat, të cilat raportuan se djali i deputetit ishte ngritur kundër të atit, dhe mbështeste opozitën.
“Me studentët…Nga Shkodra përshëndesim protestën!”, shkruhej në fotografinë e publikuar nga pedagogja.
Mirëpo keqkuptimi i kësaj fotoje nga mediat dhe ndjekësit në Facebook, u bë shkak që deputeti i PS-së, të reagonte publikisht.
“Një foto e djalit tim e nxjerrë në rrjetet sociale nga pedagogia e tij për përkrahjen e protestës së opozitës ka krijuar keqinterpretime.
Dëshiroj të marr përgjegjësinë time si prind përballë çdo socialisti dhe djemve e vajzave që besojnë tek Partia Socialiste. Sepse përgjegjësia në çdo rast është edhe e imja. Edhe, pse fotoja është bërë në një mejdis humori dhe miresjelljeje.
Ka gjëra me të cilat humori është i tepërt.”, shkruan Majko. (D.D/Shuplaka)
