Kryetari i PD, në protestën e opozitës ditën e sotme kishte ftuar edhe kryetarin e unionit të të rinjve të djathtë në Europë, Javier Mira.
Gjatë fjalës së tij pas mbështetjes që i ofroi të rinjve dhe njerëzve që kërkonin demokracinë dhe shtetin e lirë, Javier i bëri thirrje Ramës që të linte qeverinë dhe të largohej.
Ai pati edhe një mesazh për kreun e LSI-së dhe Kuvendit, Ilir Meta ku i tha se duhet të merrte përgjegjësinë për të nxjerrë Ramën nga qeveria.
“Ne i kërkojmë Ramës që të lërë qeverinë dhe Metës të marri përgjegjësinë, Meta nëse je socialist i vërtetë, nxirre Ramën nga qeveria,” tha Mira.
Ndër të tjera zyrtari europian përgëzoi të rinjtë shqiptarë, pasi sipas tij ata i jepnin kurajo europianëve për të ecur para.
“Vij nga Spanja, kam ardhur shumë herë këtu, është një vend që në fillim nuk e kupton mirë, por pastaj arrin ta duash, se është e mbushur me njerëz fantastikë që flasin me zemër. Dua që mos ta lini këtë luftë kundër kriminelëve në parlament. Kemi detyrën t’i tregoni Europës që Shqipëria është një vend i pastër. Është një vend i ri, dhe sot jeni shumë të rinj, jeni guximi që ne europianëve na jepni kurajën që të ecim para. Kjo është e ardhmja, ne jemi miq të Shqipërisë dhe njerëze që duan demokracinë,” tha ai.
Protesta e opozitës ka hyrë në ditën e saj të nëntë dhe sot përvec zyrtarëve europianë ishin të ftuar edhe njerëz të sportit që po e mbështesin këtë lëvizje.
(M.D/ Shuplaka)
Discussion about this post