Gazetari Blendi Fevziu, në një shkrim botuar në “Opinion.al” shkruan me kritika të mëdha për kompaninë “Bankers ” dhe shpërthimet që ka sjellë aktiviteti i saj në Zharrëz.
Fevziu thotë se të gjitha dyert e hetimeve për këtë firmë janë të mbyllura. Gjithashtu, ai thotë se ministrat e qeverisë Rama vetëm sa ruajnë këto biznese të fuqishme dhe nuk guxojnë të dalin kundër tyre.
“Përse Bankers qënka kaq i fortë sa shteti as nuk guxon të kërkojë as zbatimin e kontratës? Ku janë instrumentat ligjore? Ku janë organet supervizore? Përse heshtën të gjithë me vite dhe përse heshtin sërish. Aq më tepër sot që kompania nuk ka më të njëjtën pronësi. Të gjitha dyert janë mbyllur për të hetuar çështjen Bankers, sot dhe dje. Dhe me siguri nuk do të hapeshin as kaq, sikur ata banorë të mos nisnin një marrshim epik, përpara syve tallës të pushtetit dhe vështrimeve mosbesues të qytetarëve të tjerë”, shprehet Fevziu.
“Të nisnin një marrshim që na ka turpëruar sot të gjithë. Na ka turpëruar duke na kujtuar se ky vend nuk është koloni; se në këtë vend nuk e bëjnë dot ligjin as ca kompani dhe as ca biznesmenë që i kanë shndruar ministrat e shtetit në qen roje të bizneseve dhe përfitimeve të tyre të paligjshme. Se në këtë vend zëri i qytetarit duhet të dëgjohet. Dhe nëse nuk dëgjohet, ata pak banorë të Zharrzës bënë përpjekjen e parë për t’ju treguar të gjithëve, për të na e treguar të gjithëve, se si fitohet një e drejtë! Ndaj sot unë dhe të gjithë ata që mendojnë si unë ndihemi të turpëruar përpara sjelljes së tyre gjithë dinjitet”, shkruan Blendi Fevziu.
Debati për Bankers është shtuar ndjeshëm kohët e fundit pas ankesave të shumta të banorëve të Zharrëzës se atyre u janë dëmtuar banesat dhe u është ndotur pa kriter mjedisi ku jetojnë. (M.D/ Shuplaka)
Discussion about this post