Mbrëmë gjatë orëve të vona të natës, banorët e Zharrëzës që janë ngujuar prej ditësh përpara godinës së Ministrisë së Industrisë dhe Energjitikës i ka vizituar Ministri Tahiri.
Ashtu si e njoftuam edhe më parë ai ka kërkuar që ky takim të bëhej pa praninë e kamerave. Në debatin e shkurtër që pati me një nga personat që po e filmonte Tahiri i tha atij që të mos i bënte gangsterin.
Ndërkohë sot vizita e ministrit është zbardhur nga protestuesit e Zharrëzës. Ata kanë patur një kërkesë për një çadër, madje kanë thënë që iu lutën dhe ai nuk ka pranuar.
Ndërkohë që çadra në kryeqytet ka sa të duash. Duke nisur nga ajo e opozitës që ka 10 ditë në Bulevard, dhe të tjera ngrihen çdo ditë për peticionin qytetar të Vettingut.
‘’Dihet natë dimri është shumë e vështirë, patëm edhe një vizitor nga qeveria, mirë bëri që erdhi. Ishte një impenjim pa zemër, pa një fije zemër. Iu lutëm për një çadër dhe na tha ‘’ju lutem nuk iu ndihmoj dot’’. Nuk e kuptoj që në një kohë që ka plot çadra që janë ngritur çdo ditë në Tiranë, promovohet edhe Vettingu’’, thotë Qaniu protestuesi i parë.
‘’Ministri erdhi si qytetar mbrëmë, të paktën ashtu e përfoli. Po nëse do vinte si qytetar do ta kishte marrë të paktën një shishe ujë në dorë, duke na thënë bravo. Ministri mbrëmë këtu erdhi për show, për të parë apo për të zbuluar diçka nuk e di.
I thamë për një çadër të paktën për natën. Siç i thamë edhe Nikos brenda dhe na tha ngrijeni. Po ministri tha jo, jo, jo. As ndërkombëtarët nuk janë shprehur për kauzën tonë, dhe as mediat nuk kanë bërë sa duhet për të zbardhur të vërtetën’’, është shprehur një tjetër protestues.
Grevistët e Zharrëzës do të vazhdojnë të qëndrojnë përpara Ministrisë me shpresën se nga Tirana zëri i tyre do të dëgjohet më nga afër. (E.K/SHUPLAKA)
