Ka nisur në Universitetin e Thrakisë në Edrene të Turqisë përgatitja e teksteve shkollore në Gjuhën Shqipe dhe atë boshnjake, që prej vitit të ardhshëm akademik do të futen si lëndë me zgjedhje në shkollat e Turqisë.
“Anadolu Agency” bën me dije se profesorë të gjuhës shqipe dhe asaj boshnjake janë duke punuar intensivisht për përgatitjen e teksteve, pas miratimit të planprogramit të përgatitur.
Şahin Kılıç, kryetar i Departamentit të Gjuhës dhe Letërsisë Boshnjake në Fakultetin e Letërsisë në Universitetin e Thrakisë, njoftoi se lënda e gjuhës shqipe dhe ajo e gjuhës boshnjake do të mësohen për klasat 5,6,7 dhe 8. Sipas tij, këto lëndë do të japin një kontribut të madh në të ardhmen për rritjen e komunikimit në Ballkan.
Nga ana tjetër, Esin Ömer, anëtare e stafit akademike në Departamentin e Gjuhës dhe Letërsisë Shqipe, ka bërë me dije se do të mbështeten dhe nga Fakulteti Pedagogjik në aspektin teknik dhe nga Fakulteti i Arteve të Bukura për vizatimet dhe ngjyrimet në tekste. (XH.A/SHUPLAKA)
Discussion about this post