Presidenti i Partizanit, Gaz Demi, shpërtheu në akuza ndaj FSHF-së pas dënimit që Komisioni i Disiplinës dha ndaj skuadrës së kuqe për shkak të incidenteve që ndodhën fundjavën e kaluar në Kukës. Kreu i klubit të kuq, ndër të tjera deklaroi se nuk mund ta nënshtronin Partizanin disa rrugaçë të asaj Federate që rastësisht drejtojnë futbollin shqiptar.
Ndërsa presidenti i FSHF-së e konsideroi veten thjesht si një punëtor të zgjedhur në atë pozicion që mban. Në ndryshim nga Demi, kreu i Federatës është më diplomat dhe si gjithmonë i qetë në përgjigjet që jep.
Duka
I kontaktuar nga një e përditshme sportive presidenti Duka bëri të ditur se ndodhej në një takim pune jashtë Shqipërisë dhe se nuk ishte në dijeni të asaj çfarë kishte thënë presidenti i të kuqve. “Nuk di asgjë nga kritikat, pasi nuk jam në Shqipëri (sot). Megjithatë, pa i lexuar fare, po ju them diçka: Kritikat janë të mira, sjellin zhvillim”, u përgjigj fillimisht Duka.
Më tej, pasi u informua specifikisht se çfarë kishte deklaruar Demi për të dhe për institucionin që ai drejton, Duka shtoi: “Që jam punëtor, ka të drejtë. Mundohem sa më shumë të jem i tillë. Ndërsa për mënyrën se si menaxhohet Federata, gjithkush ka të drejtë të gjykojë dhe të japë opinione”.
Klubi i kuq dhe institucioni i futbollit shqiptar janë përfshirë në një përplasje të hapur mes tyre pas dënimit të Komisionit të Disiplinës dy ditë më parë, që vendosi ta ndëshkojë Partizanin me katër takime pa tifozë, në një kohë që Kukësi vetëm u gjobit pas incidenteve në sfidën e fundjavës.
Fillimisht ishin të kuqtë që reaguan ashpër ndaj FSHFsë dhe dje kjo e fundit renditi rastet kur “demat” ishin paralajmëruar për shkak të sjelljes së tifozëve dhe se vendimi i fundit ishte rrjedhojë e paralajmërimeve të mëparshme.
