Dashamir Shehi sërish në çadrën e opozitës, Komisioni i Ekonomisë i shkarkon bashkëshorten nga kreu i AMF-së

Komisioni i Ekonomisë, pas shqyrtimit të kërkesës, ka vendosur për shkarkimin nga detyra nga kreu i Autoritetit të Mbikëqyrjes Financiare, Enkeleda Shehin.

Mësohet se në mbledhjen e sotme të këtij komisioni, u votua me 9 vota pro dhe 2 kundër shkarkimit të Shehit nga kjo detyrë. Kundër lirimit të saj nga kjo detyrë kanë qenë anëtarët përfaqësues të LSi-së. Dy votat kundër kanë qenë të Gjovalin Kadelit dhe Gledion Rahovicës.

Më 27 shkurt, anëtarët e bordit të Autoritetit të Mbikëqyrjes Financiare (AMF) depozituan në Kuvend një kërkesë zyrtare ku kërkonin shkarkimin nga detyra të drejtoreshës së AMF-së.

Jo më larg se disa orë më parë, bashkëshorti i Enkeleda Shehit, Dashamir Shehi, shprehu vendosmërinë e tij për zgjedhje të lira dhe kundër kësaj mazhorance. Ai iu drejtua sërish sot çadrës së opozitës duke theksuar se partia e tij nuk do të regjistrohet në zgjedhje nëse kërkesat e tyre nuk merren në konsideratë. (XH.A/SHUPLAKA)