Sot do të jetë një përballje mjaft interesante mes Tiranës dhe Skëndërbeut. Një pjesë të madhe të vëmendjes në këtë duel e marrin trajnerët. Jo vetëm që kanë bërë rokadë me njëri-tjetrin brenda këtij sezoni, por edhe për mënyrën se si kanë shkuar në ekipet respektive për trofetë e fituar dhe protagonizmin që kanë në kampionatin shqiptar. Me gjithë diferencat, disa të përbashkëta i kanë:
TË PËRBASHKËTAT
– Të dy pinë cigare dhe rastësia bën që të konsumojnë të njëjtin markë, “Marlboro”.
– Që të dy janë trajnerë që renditen te fituesit. Mirel Josa është rekordmen, ndërsa Ilir Daja, kudo që ka shkuar, ka pasur sukses.
– Të dy janë trajnerë që u pëlqejnë skemat ofensive, gjithnjë kur kanë lojtarët e duhur.
– Të dy duan që të dominojnë ata një ndeshje, përtej rrethanave në të cilat skuadrat e tyre ndodhen sot.
– Të dy janë nga trajnerë nga kryeqyteti, por kanë lënë gjurmë edhe jashtë Tiranës. Iliri me Elbasanin, ndërsa Mireli me Skënderbeun.
– Që të dy janë shumë diplomatë.
– Që të dy ruajnë raporte të mira me drejtuesit, të paktën këtë e reflektojnë publikisht.
– Të dy arrijnë që të fitojnë zemrat e tifozëve. Daja ia doli me Tiranën, Elbasanin, Besën e Dinamon, ndërsa Josën e duan në Korçë, Shkodër dhe Tiranë.
DIFERENCAT
– Daja punon më shumë në teori. Josa e shmang këtë pjesë dhe fokusohet vetëm te përgatitjet në fushë.
– Daja është më kërkues dhe më “therës” në kritikat e tij. Madje, ndonjëherë, rrezikon edhe përplasjet dhe mjafton të përmendim rastet me Devollin apo Osmanin. Josa i shmang divergjencat dhe nuk mbahet mend që të ketë pasur ndonjë “konflikt”.
– Skuadrat që drejtojnë kanë ndryshime në cilësi dhe objektivat janë komplet të ndryshme.
– Josa e ka nisur futbollin e luajtur me Dinamon (paçka se nuk qëndroi shumë), ndërsa Daja, edhe pse është “dinamovit” në gjak, e ka nisur si bardheblu.
– Të dy kanë pasione, por edhe në këtë rast i kanë të ndryshme. Mirel Josa pëlqen muzikën, madje në vogëli edhe ka kënduar, ndërsa Ilir Daja i do shumë udhëtimet dhe makinat.
Discussion about this post