Shkarkimi i Tahirit, më në fund një reagim nga Rama: Qesh mirë kush qesh i fundit…

Që prej paradites së sotme përflitet se ministri i Punëve të Brendshme Saimir Tahiri do të largohet nga posti.

Fillimisht u tha se ai kishte dhënë dorëheqjen, mirëpo Tahiri e mohoi një gjë të tillë disa orë më vonë nëpërmjet një postimi në Facebook.

Ndërkohë kryeministri Rama nuk pati reaguar fare për lajmin. Reagimi i tij vjen rreth 7-8 orë pas publikimit të lajmit.

“Qesh mirë kush qesh i fundit”, shkruan Rama në rubrikën e tij Amarcord në Facebook. Ndoshta kjo është një përgjigje e Ramës pas festës në çadrën e opozitës, ku protestuesit ia morën valles kur mësuan për shkarkimin e Tahirit.

Përveç Tahirit,  raportohet se Rama ka në plan që të largojë edhe disa ministra të tjerë, të cilët planifikohen të jenë në ndjekje të zgjedhjeve në qarqe. Nuk dihet sa do t’i përmbahet Rama këtij plani, por emrat e përfolur janë:

1.Bledi Çuçi, ministër Shteti për Çështjet Vendore- në Gjirokastër.

2.Mimi Kodheli, ministër i Mbrojtjes- në Dibër

3.Ilir Beqaj, ministër i Shëndetësisë-Në Kukës

4.Damian Gjiknuri, ministër i Energjisë dhe Industrisë – në Vlorë.

Ky vendim i Ramës pritet të vërtetohet nesër pas mbledhjes së kabinetit qeveritar. Kjo lëvizje për të ndryshuar një sërë ministrash të kabinetit, vjen pas protestave të opozitës për zgjedhje të lira dhe të ndershme, përmes një qeverie teknike. (D.D/Shuplaka)