Kryeministri Edi Rama ka folur gjatë në mbledhjen e Kryesisë së PS-së dhe në grupin parlamentar socialist si për ndryshimet në qeveri ashtu edhe për fushatën elektorale të zgjedhjeve të 18 qershorit.
Fushata ndërkohë nuk duket aq e lehtë nisur nga protesta e opozitës që për pak ditë bën 1 muaj që mbahet brenda një çadre para zyrës së kreut të qeverisë.
Për të treguar rëndësinë që ka për Partinë Socialiste kjo fushatë elektorale, me apo pa opozitën në zgjedhje, mësohet se kryeministri është shprehur në mbledhjen e kryesisë që “çadra le të merret me 18 shkurtin, ne do të merremi me 18 qershorin”.
“Top Channel” raporton se kryeministri ka përdorur një fjali të çuditshme, kur ka komentuar protestën e opozitës. Sipas tij, “çadrën e opozitën e duan ngrehur edhe disa të huaj jashtë vendit që nuk radhiten ndër miqtë më të mirë të Shqipërisë”.
Nuk dihet ende se për cilët të huaj e ka patur fjalën shefi i qeverisë. 21 anëtarët e Kryesisë së PS u mblodhën paradite në drejtimin e Edi Ramës, për të zyrtarizuar shkarkimin e katër ministrave socialistë nga qeveria dhe diskutuar kandidaturat që do t’i zëvendësojë.
Pritet që Rama t’i nisë Presidentit shkresën e shkarkimit të ministrave Tahiri, Klosi, Beqaj dhe Çuçi dhe atë të zëvendësimit të tyre. (M.D/ Shuplaka)
Discussion about this post