Edhe pse ministrat e rinj Xhafaj, Manastirliu, Xhaçka dhe Shalsi u propozuan nga Kryeministri Edi Rama një ditë më parë, për të zëvendësuar Tahirin, Beqajn, Klosin dhe Çuçin, ata ende nuk do ta marrin zyrtarisht detyrën edhe për një javë tjetër.
Kjo sepse urdhrat e emërim-shkarkimeve nuk kanë dalë ende nga Kryeministria me firmën e Ramës, dhe presidenti i Republikës Bujar Nishani ende pret të shqyrtojë dokumentet, e më pas t’i dekretojë ato. Kështu të paktën raporton Televizioni Klan.
Të katër kandidaturat e ministrave të rinj do t’i nënshtrohen një procesi verifikimi të figurës dhe personalitetit të secilit dhe verifikimi do të kryhet nga institucionet e inteligjencës. Vetëm pasi të ketë marrë informacionin përkatës për secilin kandidat, Presidenti i Republikës do të vendosë nëse do t’i dekretojë apo jo si ministra.
Më pas do të ngelet në dorë të kuvendit, nëse do t’i miratojë apo jo dekretet e presidentit. (D.D/Shuplaka)
Discussion about this post