Deputetja e LSI-së Monika Kryemadhi ka zgjedhur ditën e djeshme të shkojë në qytetin e Elbasanit, jo pa shkak ishte dita e verës. Ajo ka vizituar Panairin e ditës e shoqëruar edhe nga ministri Haxhinasto. Përveç urimit për të gjithë shqiptarët ajo ka parë nga afër edhe punime të bëra me mjeshtri nga ana e artizanëve.
“Përfitojmë nga rasti në këtë qendër graviteti të ‘Ditës së Verës’ siç është Elbasani, t’i urojmë të gjithë shqiptarëve gëzuar Ditën e Verës, që është në një farë mënyrë një ringjallje e të mirës, e jetës dhe uroj që ky vit të jetë një vit i ringjalljes për çdo të mirë dhe begatinë e shqiptarëve.
Unë do të kisha shumë dëshirë që kjo atmosferë të jetë e përhershme, të mos jetë vetëm “Ditën e Verës”, por të vazhdojë gjithmonë dhe njerëzit ta gëzojnë jetën, sepse fundja kjo është një nga gjërat më të bukura që kemi për detyrë të bëjmë”,- tha znj. Kryemadhi.
Deputetja e LSI-së theksoi gjithashtu se pjesë e këtij panairi ishin të rinjtë e gjimnazeve të Elbasanit, duke shtuar se për idetë inovatore të rinisë duhet dhënë më shumë mbështetje.
“Ajo që më bëri më shumë përshtypje këtë radhë ishin dy stendat e gjimnazeve, të cilat kishin bërë produkte shumë të mira dhe kjo do të thotë, që të rinjtë sidomos, kanë dëshirë për të prodhuar, për të krijuar bizneset e tyre dhe ne kemi një detyrë që t’i japim shansin atyre për ta zhvilluar këtë biznes”, – theksoi deputetja Kryemadhi. (E.K/SHUPLAKA)
Discussion about this post