Presidenti i Kosovës, Hashim Thaçi, shprehet i sigurt për krijimin e Ushtrisë së Kosovës dhe për këtë thotë se nuk do të pritet për Serbinë. Në një intervistë për “Konica.al”, ai thekson se kjo nuk po bëhet për të marrë diçka në këmbim dhe nuk ka lidhje me Gjykatën Speciale.
I pyetur përse tani krijimi i një ushtrie, Thaçi shprehet se nevojitet “një forcë kjo e re, multietnike. Një forcë që do ta mbrojë integritetin territorial të Republikës së Kosovës dhe do të jetë në shërbim të gjithë qytetarëve”:
“Pse tani? Në fakt duhet të ndodhte dje, mirëpo jemi vonuar pikërisht duke u konsultuar me të gjithë që të ndodhë një proces i ngadalshëm, hap pas hapi, gradual gjithëpërfshirës, ku do të përfshihen të gjitha komunitetet. Ndërsa tani serbët, definitivisht, pas shumë konsultimeve, takimeve, bisedave kanë theksuar qartë se nuk e përkrahin themelimimn e ushtrisë së Kosovës, thotë Lista Srpska. Prandaj nuk kemi ç’të humbim kohë më tutje- edhe kështu jemi vonuar tash e tri vite, kështu që duhet të ndodhë pikërisht tani.”
Ai mohon mundësinë e ndonjë përplasje duke theksuar se që në vitin 2014, është arritur dakordësimi me SHBA-të dhe NATO-n për themelimin e Forcave të Armatosura të Kosovës.
“Duhet ta potencoj se nëse deklaratën e pavarësisë së Kosovës e kanë votuar dhe nënshkruar 109 deputetë, propozimin për themelimin e ushtrisë do ta votojnë 110 deputetë që kanë deklaruar. Do të thotë, përtej deklaratës se pavarësisë do të shkojë dhe kjo nevojë imediate dhe e fuqizimit të unitetit të Kosovës. Unë theksoj se ne edhe do ta themelojmë ushtrinë edhe do ta ruajmë partneritetin me bashkësinë ndërkombëtare, në veçanti me SHBA-në dhe NATO-n.”, thekson Presidenti i Kosovës.
(XH.A/SHUPLAKA)
