Kryetari i Lëvizjes Socialiste për Integrim, Ilir Meta, ishte i pranishëm në takimin e organizuar në Parkun Arkeologjik të Apolonisë në Fierit, ku u diskutua mbi platformën e LSI-së për zhvillimin e turizmit.
Në fjalën e tij, ai vuri në dukje potencialet e pazhvilluara të turizmit në Qarkun e Fierit, teksa theksoi rëndësinë e turizmit në të gjithë vendin.
“Turizmi është një nga shtyllat më të rëndësishme dhe ende në fillimet e veta të shfrytëzimit si potencial zhvillimi i qëndrueshëm i vendit tonë. Madje, jo vetëm që është ende në fillim të shfrytëzimit, por kryesisht është keqshfrytëzuar. Po të shohim të gjithë qarqet kryesore të Shqipërisë, qarku që është më mbrapa në zhvillimin e turizmit praktikisht është Qarku i Fierit, ku potenciali është i jashtëzakonshëm dhe është tërësisht i fjetur.
Na duhet të promovojmë edhe vlerat tona kulturore. Këtë park të jashtëzakonshëm arkeologjik të Apolonisë, parkun e Butrintit dhe gjithë pasuritë e tjera kulturore, sepse në fund fare identiteti kulturor është pjesë shumë e rëndësishme e identitetit kombëtar dhe jo vetëm kaq, por ne shohim që këto pasuri kulturore, kur ruhen, kur restaurohen, dhe njëkohësisht kur shoqërohen edhe me një infrastrukturë mbështetëse, padyshim që prodhojnë një mirëqenie për komunitetin në radhë të parë, por edhe për të gjithë vendin.”, theksoi kreu i LSI-së.
Më tej, Meta vuri në dukje se zhvillimi i turizmit në vend do të prodhonte mirëqënie më të mirë për të gjithë qytetarët, ndaj nevojitet që t’i jepet një shans të gjithëve.
(XH.A/SHUPLAKA)
