Legjenda e portës shqiptare, Foto Strakosha, ka ruajtur gjithmonë gjakftohtësinë kur ishte vetë në fushë, por emocionet janë të dukshme ndërsa flet për të birin, Thomasin, i cili sonte do të bëjë debutimin me fanellën kuqezi.
Në një intervistë për një gazetë sportive shqiptare, ai tregon bisedat me të birin si dhe këshillat që i ka dhënë për ta mbrojtur sa më mirë portën në këtë ndeshje të rëndësishme.
A e kishe pritur që Thomas të debutonte në një ndeshje të tillë me kombëtaren?
Të them të drejtën jo! Djali ka bërë paraqitje të mira dhe ka ecur në rrugën e duhur deri tani, sigurisht që jam i kënaqur. Është emocion i madh dhe përgjegjësi shumë e madhe.
Çfarë këshille i keni dhënë djalit?
Shikoni, sa më shumë rriten fëmijët, aq më pak këshilla u japim! I kam thënë vetëm të ruajë qetësinë deri në fund, sepse është shumë e rëndësishme! Të mos ndikohet nga fakti që ka rivalë të mëdhenj para. Por ndërkohë ai është i ndërgjegjshëm për këtë. Thjesht i kam kërkuar të jetë sa më i qetë.
Do bëhet Thomasi më i zoti se sa Foto?
(qesh)… Nuk e di, por në moshën që ka dhe në nivelet që luan, babai i Thomasit këto gjëra nuk i kishte parë as në ëndërr…
Çfarë është më e rëndësishme për një portier?
Jetëgjatësia në nivele të larta! Thomasi ka cilësi dhe mbi të gjitha ka karakterin e duhur! I duhet të punojë shumë, por është në rrugën e duhur.
A të shqetëson fakti që Thomasi do ketë përpara një mbrojtje të arnuar, sepse mungojnë Mavraj dhe Gjimshiti?
Thomasi duhet të mendojë të bëjë mirë detyrat e tij! Kështu do i ndihmojë shumë shokët!
Vetëm pak orë na ndajnë nga ndeshja Itali-Shqipëri e cila do të zhvillohet në stadiumin “Renzo Barbera” në shtetin italian. Ky stadium është gati të presë tifozët italianë dhe shqiptarë. Deri më tani mësohet se rreth 8.000 tifozë shqiptare pritet të jenë në mbështetje të skuadrës në ndeshjen e sotme ndaj Italisë. Ndeshja do të fillojë italian në orën 20:45 të kësaj mbrëmje.
De Biasi, trajneri i kombëtares kërkon të marrë një pikë të vlefshme, duke ruajtur portën të paprekur pritet të rreshtohet në formacion mbrojtës me modulin 4-3-2-1. Portieri i Lazios, Strakosha që pritet ta nisë si titullar, do të ketë përpara në mbrojtje Hysaj, Veselin, Ajetin dhe Agollin.
Organizimi i lojës i është besuar Kukelit, Memushajt dhe Bashës. Sadiku si sulmues i vetëm pritet të ndihmohet në krahë nga Roshi dhe Llullaku.
Duhet të theksojmë që qyteti i Palermos duket se është kthyer këto ditë në ‘qytetin e shqiponjave’, pasi që nga e enjtja tifozët kuqezi kanë mbushur rrugët e qytetit italian.
Të veshur me fanella kuq e zi, e me flamuj, këngët shqiptare dëgjohen kudo në Palermo.
Edhe pse Federata Italiane e Futbollit vendosi ta zhvendoste ndeshjen në jug të Italisë, tifozët kuqezi nuk zhgënjyen sa këtë herë të mbështesin ekipin e tyre kudo që shkon.
(M.D/ Shuplaka)
Discussion about this post