Frroku, Dajti, Hoxha e Letizia, miqësi në burgun e sigurisë së lartë në Tiranë (FOTO)

Në një foto  brenda mureve të qelive të paraburgimit te “Mine Peza” në Tiranë e siguruar nga “Lapsi”, shihen personazhe të njohur të botës së krimit.

Nga e majta në të djathtë është Dritan Dajti, i dënuar me 4 burgime të përjetshme për vrasjen e 4 policëve në Durrës në vitin 2009. Gjatë seancave gjyqësore Dajti shkon në gjykatë me paterica, pasi thotë se ka probleme me shtyllën kurrizore, por në këtë foto tregon tjetër gjë.

Në mes të fotos është ish-deputeti socialist Mark Frroku. Ai gjykohet për: Vrasjen e kryer në Belgjikë në vitin 1999, pastrimin e parave, mosdeklarim të pasurisë dhe ndërtim të paligjshëm. Frroku është i përfshirë edhe në historinë e atentatit që pretendohet se është porositur nga kreu i Kuvendit, Meta, ndaj deputetit socialist Tom Doshi.

Në krah të Frrokut ndodhet italiani Salvatore Letizia, i njohur si “vrasës me pagesë”. Ai ndodhet në proces gjykimi në Gjykatën e Krimeve të Rënda, për vrasjen e dy shtetasve shqiptarë pranë Fakultetit të Shkencave të Natyrës, ku mbeti i vrarë gjithashtu edhe shoku i tij.

Ndërsa i fundit në foto është Ermal Hoxha, nipi i ish-diktatorit Enver Hoxha. Ermali është arrestuar nga  operacioni në Xibrakë të Elbasanit, ku u zbulua laboratori i kokainës. Hoxha akuzohet si pjesë e grupit kriminal që merrej me përpunimin dhe trafikun e kokainës. Edhe ai është në proces gjykimi në Gjykatën e Krimeve të Rënda, shkruan Lapsi.al. (M.D/ Shuplaka)