Ministrja e re e Mirëqenie Sociale Olta Xhaçka mori pjesë sot në Konferencën Kombëtare mbi kujdesin alternativ për fëmijët pa kujdes prindëror. Në konferencën në fjalë, Xhaçka shihet pranë kryebashkiakes demokrate të Shkodrës Voltana Ademi, me të cilën kryeministri Edi Rama ka debatuar lidhur me rikonstruksionin e “Kafes së Madhe”, por jo vetëm.
Mirëpo duket se dy gratë merren vesh mirë me njëra tjetrën, pavarësisht kundërshtive ideologjike, sidomos kur bëhet fjalë për çështje aq sensitive siç është kujdesi për fëmijët.
“Unë jam bërë nënë rishtazi dhe kur bëhesh nënë ka një moment magjik, që shënon një rrugëtim të gjatë, të bukur, të vështirë e plot emocione. Është pikërisht momenti i vështrimit të parë magnetik i fëmijës tënd. Në atë moment konkretizohet lidhja e fortë dhe speciale që ke me të.
Unë di, që sot janë 5 ose mbase më shumë foshnje në Njësinë e Braktisjes së Bebeve në maternitetin “Mbretëresha Geraldinë” dhe ato bebe janë në kërkim të vështrimit të figurës mëmësore, në kërkim të sigurisë së qëndrueshme, në kërkim të ledhatimeve dhe dashurisë pa kushte.
Bebet vijnë aty vetëm me një emër, madje njërës prej bebeve ia kish vënë emrin punonjësi i nderuar i policies, që e kishte gjetur në rrugë të braktisur.
Ato bebe, në rastin më të mirë gjejnë një sistemim në një përkujdesje me bazë familjen dhe në rastin më të keq do të vazhdojnë kalvarin e kalimit nga një institucion në një tjetër deri sa të dalin në jetë. Dhe sipas statistikave ka më shumë gjasa të ndodhë kjo e fundit.”, tha ministrja në Konferencë.
Ndër të tjera Xhaçka shprehet se Qeveria dhe Ministria kanë ndërmarrë një seri reformash, lidhur me këtë çështje. Ajo foli për disa ndryshime thelbësore që kontribuojnë në sistemin e përkujdesit ndaj fëmijëve dhe për të cilat shprehet se janë angazhuar seriozisht. Dy prej tyre kanë të bëjnë me legjislacionin dhe me fushatat ndërgjegjësuese. (D.D/Shuplaka)
