Pas deputimit të suksesshëm të sopranos Ermonela Jaho në “Royal Opera House” në Londër, “The Indipendent” e cilësoi shqiptaren si “Madama Butterfly” më e mirë e operës gjatë këtyre viteve.
Gazetarja Sonila Meço deklaron se ky është LAJM, lajmi që atë e merr malli të lexojë. Meço shpreh gjithë vlerësimin e saj për sopranon shqiptare dhe shton se lotët janë të pashmangshëm pas një interpretimi të tillë.
“Një çast, para se të shtrëngojmë dhëmbët për të ‘kafshuar’ lajmin e ditës, të çlodhim shqisat…
Ermonela Jaho mahnit Londrën me Madama Butterfly. Kritika, ajo që vendos realisht fatet e artistëve në skenë na fton të mbajmë shami rezervë si publik, lotët janë të pashmangshëm prej një interpretimi të pahasur në skena prej vitesh…
Kushedi kur vjen një lajm i ngjashëm këtyre anëve.
LAJM!
Që një shqiptare arrin të përmbushë ëndrrën e Puccini-t për një Madama që ka imazhin e një 15 vjeçareje, por fuqinë vokale të një 40 vjeçareje, të ngjajë japoneze, por të këndojë si italiane, të jetë e brishtë si një flutur, por e fortë për të drejtuar një orkestër. Shqiptare Madama e skenës, ndërkohë që ‘skena’ në Shqipëri…
Përfundojeni si të doni, me lajmin e radhës.
Po rri edhe pak tek Madama Jaho, lajmi që më merr malli të lexoj…”, shkruan Meço.
Mediat britanike shkruajnë se Ermonela Jaho është shfaqur shumë mirë me rolin e saj, duke luftuar mes ankthit dhe frikës. Opera “Cio Cio San” është shfaqur si një dramë bindëse nën dirigjimin e Antonio Pappano-s e me zërin e Ermonela Jahos. (D.D/Shuplaka)
Discussion about this post