Deklarata e Kryeministrit Rama se Presidenti i ri i Republikës, mund të jetë një emër nga diaspora, ka sjellë reagimin e analistit Lutfi Dervishi.
Dervishi, përmes një statusi në rrjetet sociale, ka kundërshtuar Kryeministrin Rama duke i kujtuar, se sipas Kushtetutës, kandidati për president duhet të ketë jetuar të paktën për 10 vite në Shqipëri.
“President mund të zgjidhet vetëm shtetasi shqiptar që nga lindja, me qëndrim jo më pak se 10 vjetët e fundit në Shqipëri dhe që ka mbushur moshën 40 vjeç. Pra, duhet të ketë lindur në Shqipëri. Të ketë patur durimin të jetojë së paku 10 vitet e fundit këtu dhe të ketë mbështetjen e më së paku 20 deputetëve”, shkruan Dervishi.
Statusi i Dervishit:
President nga diaspora….?
– Këtë nuk e kam menduar, por faleminderit që më dhatë një ide. Nuk e përjashtoj asnjë mundësi. Kandidati mund të jetë edhe nga diaspora”. Kjo është përgjigja e kryeministrit Rama në intervistën dhënë për gazetarin Enver Robelli. Nuk është vetëm kryeministri që nuk e ka menduar ndonjëherë një kandidat për President nga diaspora. Edhe hartuesit dhe miratuesit e kushtetutës janë kujdesur që t’i pritet rruga një kandidati nga diaspora. Neni 86, pika dy pothua e përjashton mundësinë e një kandidati nga diaspora. “President mund të zgjidhet vetëm shtetasi shqiptar që nga lindja, me qëndrim jo më pak se 10 vjetët e fundit në Shqipëri dhe që ka mbushur moshën 40 vjeç” Pra, duhet të ketë lindur në Shqipëri. Të ketë patur durimin të jetojë së paku 10 vitet e fundit këtu dhe të ketë mbështetjen e më së paku 20 deputetëve. Kandidat nga Diaspora? Po si mor jahu- do të thoshte një tirons me rronj e me degë! Diasporën e duam për paratë që të investojë, e duam për lobim, e duam për dekor, e duam për.. gjithçka, por kur vjen puna te pushteti, nuk kemi nevojë jo më për kandidatë, por as për mend. Kushtetuta është ligji themeltar i shtetit që na dëfton si duhet të qeverisimi. Kushtetuta nuk është libër për t’u argëtuar dhe as vile rrushi që ti mund të zgjedhësh kokrrat që të pëlqejnë, është libri i shenjtë që duhet ruajtuar dhe respektuar dhe jo tabela e parë e qitjes për pikë elektorale. (M.D/ Shuplaka)
Discussion about this post