Ish-Ministri i Drejtësisë Ylli Manjani ka lëshuar ditën e sotme një tjetër deklaratë të fortë.
Ish-Ministri është ndalur tek faktori ndërkombëtar, që sipas tij është më i dobëti që ka qenë ndonjëherë në vendin tonë. Sipas Manjanit, krerët e diplomacisë së vendeve kryesore në Shqipëri, lëshojnë shpesh herë mesazhe të paqarta, ndërsa shton se ata madje favorizojnë edhe krahë të caktuar politikë.
“Ky është niveli më i dobët i ndërkombëtarëve që ka qenë ndonjëherë në Shqipëri. Duhet ta pranojmë është fakt. Japin mesazhe të paqarta. Pa llogaritur që janë herë në favorin e njërës palë e herë në tjetrën” ,-tha Manjani teksa flitej për prezencën e OSBE-ODIHR dhe organizmave të tjerë që do të monitorojnë zgjedhjet e ardhshme.
Manjani tha po ashtu se tashmë dihet publikisht se çfarë u ndodh atyre që kanë një mendim ndryshe në qeveri, duke nënkuptuar shkarkimin e tij nga detyra në janar të këtij viti.
“Unë jam shembull i mendimit ndryshe brenda qeverisë Rama dhe të gjithë e panë se çfarë ndodhi. Dhe pse ndodhi kjo? Se fola për kanabisin. Në fakt po të shohësh sot planin e masave, është saktësisht ajo çfarë unë kam thënë dhe kërkuar nga qeveria”,- u shpreh Manjani.
(M.D/ Shuplaka)
