Pas konferencës për shtyp të Avokatit të Popullit Igli Totozani, ku deklaroi se lista e kandidatëve që plotësojnë kriteret formale për institucionet e vetingut ka shkuar në 84, pas mundësisë së dytë që iu dha atyre për të plotësuar dokumentacionin ligjor, reagon koordinatorja në Partinë Demokratike Endira Bushati.
Bushati deklaron se procedura e rivlerësimit të kandidatëve është në kundërshtim me Kushtetutën, madje shton se Totozanit i ka mbaruar mandati me kohë.
Gjithë procesin e vlerësimit të dokumentacionit të kandidatëve për organet e Vettingut, që u realizua nën monitorimin e ekspertëve të Operacionit Ndërkombëtar të Monitorimit (OMN), ish-kryetarja e AMA-s e cilëson si një komedi.
REAGIMI I BUSHATIT
Pashë sot Avokatin e Popullit në konferencë për shtyp…
Me kokën ulur po na bënte me dije se….pas “kohës që dhuroi Partia”, nga 21 kandidatë që plotësonin kriteret për Vettingun, tak-fak na rilindën 84 kandidatë plotësues kriteresh….
Së pari, procedura e rivlerësimit të kandidatëve është në kundërshtim me Kushtetutën…
Së dyti, “e pakuptueshme” është se si ia paskan këputur kot edhe Avokati i Popullit dhe ONM kur herën e parë konstatuan që i plotësonin kriteret 21 kandidatë dhe tani na doli që i plotësokan 84 kandidatë…
Së treti, e di një Tiranë e tërë se Avokatit të Popullit Igli Totozani i ka mbaruar me kohë mandati dhe po lobon me ambasada&co që të rizgjidhet prapë….
Se ç’proces i besueshëm Vettingu do të bëhet pas gjithë kësaj komedie, besoj se për çdo jurist është e qartë….
Më vjen keq për ata shqiptarë që besuan…
Kanë 2 vjet që shohin ëndrra me Vetting…! (D.D/Shuplaka)
