22-vjeçarja Kristina Pjetri është arrestuar sot nga policia në vijim të operacionit “Gracka”. Vajza pikaste qytetarët dhe u afrohej, duke u kërkuar telefonin celular, me arsyetimin se ishte vonë dhe duhet të lajmëronte nënën e saj.
Kristina Pjetri, në dëshminë para uniformave blu ka treguar rolin e saj në 7 grabitjet e kryera. Ajo ka rrëfyer se është e dashura e Fatjon Bushgjokajt, i dënuar më parë për grabitje dhe i njohur si kreu i bandës.
Jam e dashuruar me të dhe ndaj i kam bërë të gjitha”, -mësohet të ketë thënë Pjetri para hetuesve, shkruan BW.
Për të kryer goditjen e tyre, të dyshuarit vepronin pasdite vonë dhe në zona periferike.
Sipas njërit prej të kapurve, telefonat e grabitur, i shisnin në tregun çam, për 3 apo 5 mijë lekë të reja, ndërsa disa sende më vlerë vëllezërit Bushgjokaj, i kishin groposur në oborrin e një shtëpie të braktisur në zonën e Kamzës.
Tre vëllezërit, Fatjon, Aleksandër dhe Ndue Bushgjokaj, bashkë me të njohurin e tyre, Elton Leka, ishin kthyer në tmerrin e qytetarëve në periferi të kryqytetit, pasi i grabisnin me dhunë.
Të dyshuarit dolën përpara gjykatëses Alma Kodraliu, e cila caktoi ndaj tyre masën e “arrestit me burg”, për akuzën e grabitjes me dhunë kryer në bashkëpunim. (M.D/ Shuplaka)
