Kryeministri Edi Rama ka lënë zyrën e Kryesisë pas 90 minutave takim me kreun e Kuvendit Ilir Meta. Si zakonisht ai nuk ka bërë një deklaratë për mediat po vetëm është larguar në drejtim të makinës së tij.
Duhet thënë se takimi i sotëm ka qenë relativisht i gjatë dhe Rama e Meta nuk kanë zgjedhur të shoqërohen nga të tjerë persona.
Ky takim i sotëm vjen në një moment mjaft të rëndësishëm përsa i përket zhvillimeve politkie, ku gjithnjë e më shumë shihet e nevojshme një përafrim në qëndrimet mes palëve.
Ditën e dielë pati një takim mes Ramës dhe Metës te ‘Pazari i Ri’ ku shumë u përfol për një marrëveshje të arritur, gjë e cila nuk rezultoi e vërtetë më pas.
Meta dhe Kryesia e LSI-së dolën me qëndrimin e prerë se pa opozitën nuk ka as koalicion dhe as zgjedhje. Për herë të parë nga Meta u përmend qeveria e besimit, një term i ri ky, qeveri e cila do të rikthejë besimin e opozitës te zgjedhjet dhe standardi i tyre.
Nga ana tjetër edhe dita e djeshme nuk ka qenë më pak e vrullshme, ku Basha nga çadra deklaroi se nuk tërhiqet nga kërkesa për qeveri teknike, ndërsa kryeministri pavarësisht vullnetit për dialog nuk tërhiqet nga e tija se zgjedhjet duhet të mbahen në 18 qershor.
Ndërkohë që një tjetër zhvillim është raportuar dje nga ‘Shuplaka’, sipas burimeve tona Engjëll Agaçi dhe Oerd Bylykbashi kanë pasur dje një takim, ku nuk përjashtohet mundësia e diskutimit të qeverisë teknike. (E.K/SHUPLAKA)
Discussion about this post