Nisja e sulmeve në raketa në Siri nga ana e marinës amerikane në Mesdhe duket se nuk i ka pëlqyer aspak Rusisë. Sulmi nisi në orët e para të mëngjesit dhe 56 raketa u hodhën në drejtim të aeroportit ushtarak “Al-Shayrat”.
Kjo ofensivë nga ana e amerikanëve ka ardhur menjëherë pas lajmeve se në Siri po përdoreshin armë kimike mbi popullsinë civile. Po ky fakt duket se ka nxitur një reagim të menjëhershëm nga ana e rusisë e cila e konsideron të papranueshme ndërhyrjen.
Putin ka kërkuar menjëherë mbledhjen e këshillit të Sigurimit duke e konsideruar cënimin e Sirisë ‘si një shtet sovran’.
“Presidenti Putin i konsideron sulmet amerikane në Siri agresion kundër një shteti sovran në kundërshtim me normat ndërkombëtare, dhe nën një pretekst të shpikur”, është shprehur zëdhënësi i Kremlinit Peskov.
Nga ana tjetër Trump është shprehur se është e pafalshme vdekja e fëmijëve nga armët kimike. Ai u shpreh se sulmet ndaj regjimit të Asadit do të vijojnë.
“Edhe foshnje të bukura u vranë në mënyrë brutale. Është një vdekje e ngadaltë dhe barbare. Asnjë fëmijë i Zotit nuk duhet të vuajë një horror të tillë. Kryem sulmet e para, por do shihni që ky është vetëm fillimi”, mësohet të ketë thënë Trump. (E.K/SHUPLAKA)
Discussion about this post