Sherri me armë me të disa të rinjve në qytetin e Elbasanit për pak sa nuk është kthyer në tragjedi. Ashtu si gjithë sherret mes të rinjve shkaqet janë gjithnjë banale dhe të zakonshme. Ngjarja ndodhi në një restorant, në periferi të qytetit të Elbasanit, në përfundim të superstradës për në Metalurgji.
Dy grupet që po drekonin veçmas, fillimisht kanë debatuar dhe i janë hakërryer njëri-tjetrit me fjalë e më pas kanë dalë për t’u sqaruar në ambientet e jashtme të restorantit, në zonën e parkimit, ku nisën dhe të shtënat e armëve.
Mësohet se dy kushërinjtë, K. Gjini dhe A. Gjini, kanë qenë bashkë me një mikun e tyre duke drekuar. Në të njëjtin lokal drekonin edhe një grup tjetër personash, mes tyre edhe H. Çopja.
Dëshmitarë të ngjarjes kanë deklaruar në polici se mes dy grupeve ka nisur një debat verbal me fjalë në distancë nga tavolina në tavolinë.
Më pas, dy kushërinjtë, të cilët prej vitesh janë rezidentë në Angli, kanë dalë jashtë dhe të dyja grupet kanë nisur të konfliktohen me njëri-tjetrin me grushte, si edhe me mjete të forta, raporton një e përditshme.
Nga hetimet e Policisë mësohet se shkak për nisjen e konfliktit kanë qenë pikërisht dy kushërinjtë Gjini, të cilët rreth një muaj më parë janë kthyer nga Anglia për të kaluar pushimet në Shqipëri.
Këta të fundit, sipas dëshmive, janë sjellë me superioritet karshi grupit tjetër, duke ngritur zërin dhe ekspozuar paratë e vëna në emigracion e makinat.
Kjo ka “xhelozuar” grupin e ulur në tavolinën pranë tyre, ku fillimisht ka nisur debati në formën “pse më sheh” e më pas gjithçka përfundoi me grushte e armë.
Pasi kanë dalë jashtë restorantit, grupi i H. Çopjes kanë nxjerrë të parët armët dhe më pas edhe grupi i A. Gjinit, ku kanë nisur të qëllojnë në drejtim të njëri-tjetrit. Konkretisht janë plagosur me armë zjarri shtetasi K. Gjini, si dhe H. Çopja.
I plagosur me mjete të forta ka mbetur edhe A. Gjini. Sipas mjekëve, gjendja e tyre shëndetësore është jashtë rrezikut për jetën. Policia, e ndodhur në vendin e ngjarjes, brenda pak minutave ngriti pikat e kontrollit dhe më pas ka konstatuar se në konflikt ishin përfshirë 4-5 persona.
Në vendin e ngjarjes janë sekuestruar më shumë se 20 gëzhoja arme të tipit pistoletë. Mësohet se Çopja ka marrë një plumb në shpatull, ndërsa K. Gjini, sipas mjekëve, ka një plumb shumë pranë kokës, por ndodhet jashtë rrezikut për jetën.
Discussion about this post